Meitheamh 2014
Clic-Pic don Scéal

Gradaim Chumarsáide an Oireachtais, 2014

Thug an duine is óige ar an ngearrliosta duais léi ag Gradaim Chumarsáide an Oireachtais

Bhuaigh an té is óige ar an ngearrliosta ar fad, Doireann Ní Fhoighil, Aisteoir na Bliana ag Gradaim Chumarsáide an Oireachtais, 2014, don ról a bhí aici sa ghearrscannán Rúbaí, scéal faoi chailín óg a fhógraíonn gur aindiachaí í agus nach bhfuil sí ag iarraidh páirt a ghlacadh i Lá na Chéad Chomaoineach leis na páistí eile sa rang. Bhí Gradaim Chumarsáide an Oireachtais ar siúl Dé hAoine, an 16 Bealtaine in Óstán Galway Bay agus ba é Aengus Mac Grianna a bhí á gcur i láthair. I measc na mbuaiteoirí eile bhí Róisín O’Hara, a bhain an duais amach do Chraoltóir Teilifíse na Bliana, agus Garraí Glas ar éirigh leis an teideal Sraith Teilifíse na Bliana a sciobadh. Bhí an-oíche ag RTÉ Raidió na Gaeltachta – bhuaigh Helen Ní Shé Craoltóir Raidió na Bliana agus ba é an clár a chuireann sí i láthair, An Saol ó Dheas, Sraith Raidió na Bliana.

Déantar ceiliúradh ar an gcuid is fearr den éacht oibre a chuirtear i gcrích in earnáil na cumarsáide Gaeilge gach bliain agus na gradaim seo á mbronnadh, agus tugtar ómós do na haisteoirí, do na hiriseoirí, do na láithreoirí, do lucht déanta na gclár agus do dhaoine eile san earnáil a rinne sár-ionchur sa ghort sin le bliain anuas.

1. TEILIFÍS: SRAITH TEILIFÍSE NA BLIANA
Garraí Glas - Abú Media

2. TEILIFÍS: SCANNÁN / CLÁR TEILIFÍSE NA BLIANA
Páidí Ó Sé – Rí an Pharóiste - Magamedia

3. TEILIFÍS: CRAOLTÓIR TEILIFÍSE NA BLIANA
Róisín O’Hara - Róisín

4. AISTEOIR NA BLIANA
Doireann Ní Fhoighil - Rúbaí, Rúbaí

5. RAIDIÓ: CLÁR / SRAITH RAIDIÓ NA BLIANA
An Saol ó Dheas - RTÉ Raidió na Gaeltachta